20 Oct

بيت جوهاري – شطب بيتك ودور بنفسك

مش معنى اننا وصلنا للغرفة الرابعة والاخيرة اننا كده خلاص قربنا نخلص رحلة التشطيب والصيانة لبيت جو وهاري ، انا عايز اقولك ان اللي فات كوم واللي جاي كوم تاني خاااالص لان الجواب باين من عنوانه الغرفة دي اسمها الغرفة المجهولة عارف يعني ايه انت داخل مكان مجهول ، عارف كمية الجهد اللي بتبذله وحالة التركيز اللي بتكون فيها عارف ان الغرفة دي قد يكون فيها صفات وملكات ومهارات تساوي ملايين اذا عرفتها واستثمرت فيها وحولتها الى نقاط قوة لديك لكنك للاسف الشديد لا تعرفها وايضا لا يعرفها الاخرون عنك

في اوضة في البيت بتكون مقفولة ومهملة ومع الوقت بنعتبرها مش موجودة في البيت وبننسى فيها ايه ، مش بس كده احنا في اوقات كتير مش بنعتبرها اصلا اوضة موجودة في البيت ، ممكن علشان مش بنشتغل في مكان موفرلنا مناخ نستخدم فيه حاجة من الغرفة دي او بسبب مدير مش شايفك غير انك ترس لازم يخلص اللي وراه او بسبب انك زوج/زوجة اقنع نفسه انه لازم يكمل حياته كده او بسبب انك استسلمت وعايش الحياة علشان اللي حواليك عايشين كده ايا كان السبب ايه ، خلي في بالك دايما ان حياتك هي اختيارتك حتى لو الاخرين هما اللي بيختاروا ليك فانت برضو اللي اخترت ده من البداية

مفتاح اللغز في الغرفة دي زي ما قال الشاعر قوم دور بنفسك جوه نفسك !! الشاعر قال كمان قوم دور بنفسك جوا نفسك هتلاقي حاجة ما حدش فيها ينافسك !! ما تضحكش لان الكلام سهل بس الفعل صعب جدا عارف يعني ايه تفتح اوضه انت كنت ناسيها ، جربت تدخل في مكان مليان تراب وكراكيب وتنظفة وترتبه ، جربت كده لو انت زي حالاتي شنطة عربيتك مليانه حاجات انت ما تعرفش عنها حاجة وعلشان الموضوع صعب لما بتحن على العربية وتنظفها في المغسلة بتخليهم يغسلوا وينظفوا كل حاجة في العربية ما عدا الشنطة ، الموضوع اصعب من اي مثال انا ذكرته انت مطالب انك تبذل فلوس وقبل الفلوس وقت ومجهود علشان توصل لسر الخلطة بتاعتك اللي لا انت عارفها ولا اللي حواليك عارفينها ، اقرا مفتاح اللغز تاني كده كلمة كلمة قوووووم دووور بنفففففسك جوا نفففففسك هتلاااااااااقي حاجة ما حددددددش فيها ينافففففسك ، الموضوع ده لما بتوصله بيتوقف عليه قرارات مصيرية في حياتك مش لازم تكون بالشكل ده بس وارد توصل انك تنقل ادارة تانية او شركة تانية او تشارك حد او تفتح شركة جديدة اصلا او انك تتجوز او تنفصل او ترجع بلدك او تهاجر منها.

الموضوع صعوبته مش في القرار اللي هتاخده في الاخر علشان وقتها القرار هيكون اسهل مما تتخيل ، الصعوبة هتكون في رحلة البحث داخل الغرفة الرابعة لانها زي ما قلتلك بتاخد فلوس وقبل الفلوس وقت ومجهود ممكن على الاقل يكون من سنه ونص لسنتين.

الرحلة صعبة لانك بتحتاج تتعلم حاجات جديدة وتصاحب ناس جديدة وتصبر وقت كتير و تغير عادت  ومفاهيم انت عايش بيها والاهم من كل ده تعرف انت فين دلوقتي مش انت رايح فين وده صعب قوي ومن الحاجات اللي بتساعدك في الرحلة دي صاحب معين مؤمن بيك وبيدعمك زي ما انت والصاحب ده ممكن يكون زوج/زوجة او اب او ام وللاسف ممكن ما تلاقيهوش ساعتها هتحتاج تدور على معلم ممكن يكون حد حضرت معاه تدريب او مدير ليك او كوتش بتقابله مرة او مرتين كل شهر

السؤال الاهم اللي لازم تساله ايه اول خطوة هتعملها علشان تقدر تتعرف على المساحة دي وتطورها؟

Leave A Reply

Your email address will not be published. Required fields are marked *