20 Jan

بيت جوهاري – شطب بيتك وكبرالمساحة

زي اي بيت في الدنيا بيحتاج من وقت للثاني انه يتجدد او يتشطب او يتعمله صيانة وكذلك الحال في شخصيتك اللي اتكلمنا عنها في المقال اللي فات ، البيت لما بنهمله بيكون في الاول مش نظيف ومش مرتب ومع مرور الوقت مش بنحب نقعد فيه ويوم ورا التاني بنهجره خالص لدرجة اننا ساعات بننسى العنوان من كتر ما بعدنا عن البيت ومعالم البيوت اللي حواليه بتكون هي كمان اتغيرت طب ايه حكاية انك تشطب شخصيتك او تجددها او تعملها صيانة ؟ تعالوا نعرف الحكاية مع بعض

اتعرفنا مع بعض في المقال السابق على بيت جو هاري وعرفنا اننا عندنا اربع غرف كل غرفة فيهم تحتاج الى معرفة وعناية علشان اوصل لاحسن اداء في حياتي مع نفسي والناس اللي حواليا اللي بتعامل معاهم على اختلاف المناصب والادوار اللي بلعبها في حياتي الان

خلونا نبدا بالغرفة الاولى في البيت واللي عرفنا ان جو وهاري سموها الغرفة المفتوحة علشان فيها الكثير من الصفات التي تعرفها عن نفسك ويعرفها الاخرون عنك في اي مجتمع تتعامل فيه او اي منصب او دور تلعبه فالاخرون هنا يقصد بهم الاصدقاء والعائلة وزملاء العمل والجيران وغيرهم الامر في النهاية متوقف على ما تظهره وتسمح للاخرين بالتعرف عليه فمثلا اذا كنت تعرف عن نفسك انك صاحب صاحبه والاخرون يعرفون ذلك عنك فحتما هذه الصفة ستكون في هذه الغرفة

وفي قريتنا بتبقى عاملة زي اوضة المسافرين علشان بتتفتح بس للضيوف وكانت امي بتحكيلي ان البيوت والسريات الكبيرة في قريتنا كان بيبقى فيها جزء اسمه السلاملك علشان اي حد من بره البيت يقدر يتجول فيه بسلام من غير ما حد يكلمه ومن غير ما يؤذي اهل البيت ودي بتبقى عاملة اليومين دول زي اوضة الصالون او السفرة او اي مكان في بيتك بتسمح ان حد من بره البيت يدخله ، دايما المنطقة المفتوحة في شخصيتك واللي بتتعامل فيها مع اللي حواليك بيكون فيها اجمل حاجة عندك بتكون مترتبة ونظيفة وكل حاجة بتكون في مكانها

مفتاح اللغز في الغرفة دي كبر المساحة!! اينعم اللي سمعته كبر المساحة!! واقصد بيها هنا ان كل ما كانت المساحة كبيرة في انك تعرف الناس اللي حواليك على مميزاتك وعيبوك وايه اللي بيبسطك وايه اللي بيضايقك كل ما كانت علاقتك بيهم هتكون في حالة افضل وما تفهمش من كلامي ان كل الناس لازم تعرف كل حاجة عنك طالما بيتعاملوا معاك الموضوع في النهاية مرتبط بدورك او المنصب اللي انت فيه ، يعني مثلا منصبك كابن/ابنه هيكون مختلف عن منصبك كصديق/صديقة وكذلك الحال منصبك كزوج/زوجة مختلف تماما عن منصبك في الشغل لان كل منصب من دول بيحتاجك تكبر مساحة الغرفة دي بالشكل اللي يسمح بتحسين العلاقة وفي النهاية المتحكم في تكبير وتصغير المساحة هو انت.

السؤال الاهم اللي لازم تساله على طول علشان تقدر تتحكم في المساحة دي وتطورها انت تعرف ايه عن نفسك؟

Leave A Reply

Your email address will not be published. Required fields are marked *